Facebook, Periscope and oda social media sites don pull down one viral video of African doctor wey claim say she use hydroxychloroquine, zinc, and antibacterial drug, Zithromax to treat Covid-19 patient for United States of America.
Evidence no dey say di drug fit fight di virus, and regulators warn say e fit cause heart problems.
Dem pull am down afta pipo don view di video 14 million times even as US President Donald Trump retweet di Periscope video before dem take am down.
For di video, Dr Stella Immanuel wey be primary health physician for Houston tell tori pipo for news conference for US say she don treat ova 350 patients wey get Covid-19.
According to Dr Immanuel, she say some of her patients na old pipo, some get diabetes, high blood pressure and asthma.
“I give dem hydroxychloroquine, I give dem zinc, I give dem Zithromax and all of dem well ” Na wetin Dr Stella tok.
Coronavirus still dey spread across di world, with more than 16 million confirmed cases for 188 countries. Almost 650,000 don die from di disease.
Why Facebook take am down?
Facebook policy communications director Andy Stone tweet say: “We remove am for sharing false information about cures and treatments for Covid-19.”
Wetin be WHO stand about hydroxychloroquine?
Wia dis foto come from, Getty Images
Wetin we call dis foto, Dem produce di drug originally to treat malaria
World Health Organization announce on July 4 say dem don stop dia trial of hydroxychloroquine and lopinavir/ritonavir drugs.
Dem organize di trial to find out how effective di drugs be to treat Covid-19.
According to di result of di trial wey dem do, hydroxychloroquine and lopinavir/ritonavir no really reduce death of Covid-19 patients for hospital wen you compare to di regular treatment wey dem receive.
Who be Stella Immanuel?
Dr Stella Immanuel na primary health physician wey dey work for Rehoboth medical centre for Houston Texas.
According to her, she attend medical school for University of Calabar for south- south of Nigeria.
Content retrieved from: https://www.bbc.com/pidgin/tori-53568290.